ქართული დოკუმენტი საზღვარგარეთ (და უცხოური საქართველოში) მხოლოდ მაშინ მოქმედებს, როცა მისი ნამდვილობა საერთაშორისოდ დადასტურებულია. ამის ორი გზაა: აპოსტილი, ერთი სტანდარტული შტამპი ჰააგის კონვენციის წევრ ქვეყნებს შორის, და ლეგალიზაცია, მრავალსაფეხურიანი დადასტურება საკონსულოს ჩათვლით, დანარჩენი ქვეყნებისთვის. არჩევანი თქვენზე არ არის დამოკიდებული: მას მიმღები ქვეყანა განსაზღვრავს.

რა არის აპოსტილი და რა ლეგალიზაცია

აპოსტილი 1961 წლის ჰააგის კონვენციით შემოღებული სტანდარტული დამოწმებაა: ერთი შტამპი ან ფურცელი, რომელიც ადასტურებს, რომ დოკუმენტზე ხელმოწერა, ბეჭედი და ხელმომწერის თანამდებობა ნამდვილია. აპოსტილიანი დოკუმენტი კონვენციის ყველა წევრ ქვეყანაში დამატებითი დადასტურების გარეშე მიიღება. საქართველო კონვენციაში 2007 წლიდანაა.

ლეგალიზაცია იმ ქვეყნებისთვისაა, რომლებიც კონვენციის წევრი არ არიან: დოკუმენტს ჯერ გამცემი ქვეყნის უწყება ადასტურებს, შემდეგ საგარეო საქმეთა სამინისტრო, ბოლოს მიმღები ქვეყნის საკონსულო. მეტი საფეხური, მეტი დრო და საფასური.

არცერთი არ სჭირდება, თუ ორ ქვეყანას შორის სამართლებრივი დახმარების ორმხრივი შეთანხმება მოქმედებს, რომელიც დოკუმენტების ურთიერთაღიარებას ითვალისწინებს; ეს კონკრეტულ ქვეყანაზე მიმღებ უწყებაში დააზუსტეთ, რადგან პრაქტიკა უწყებების მიხედვით განსხვავდება.

რომელი ქვეყანა რას ითხოვს

წევრობის სია იცვლება: ბოლო წლებში ჩინეთი და კანადა შეუერთდნენ, ამიტომ ძველი რჩევები („ჩინეთისთვის ლეგალიზაცია") აღარ მუშაობს. ყოველთვის შეამოწმეთ hcch.net-ზე ან მიმღებ უწყებაში, თან ჰკითხეთ, სად უნდა იყოს თარგმანი გაკეთებული: ზოგი ქვეყანა ადგილობრივ ნაფიც თარჯიმანს ითხოვს, ზოგი ქართულ ნოტარიულად დამოწმებულს იღებს.

სწორი თანმიმდევრობა: ნოტარიუსი, აპოსტილი, თარგმანი

1. დოკუმენტი და ნოტარიუსი. ორიგინალი სახელმწიფო დოკუმენტი (დაბადების მოწმობა, დიპლომი, ცნობა ნასამართლობაზე) ხშირად პირდაპირ აპოსტილდება. კერძო დოკუმენტი (მინდობილობა, თანხმობა, განცხადება, ხელშეკრულება) ჯერ ნოტარიუსთან მოწმდება: სწორედ ნოტარიუსის ხელმოწერას აპოსტილებენ. ასლს კი ნოტარიუსი ამოწმებს (4 ₾-დან) და მერე აპოსტილდება.
2. აპოსტილი. საქართველოში აპოსტილს იუსტიციის სამინისტროს სახელმწიფო სერვისების განვითარების სააგენტო გასცემს იუსტიციის სახლებში და my.gov.ge-ზე; საფასური და ვადა (რამდენიმე დღიდან იმავე დღემდე) დაჩქარების მიხედვით განსხვავდება, დააზუსტეთ განაცხადისას.
3. თარგმანი. აპოსტილის შემდეგ, რომ თარგმანი აპოსტილსაც მოიცავდეს. თარგმანს დიპლომირებული თარჯიმანი აკეთებს, ნოტარიუსი მის ხელმოწერას ამოწმებს (6 ₾-დან + 5 ₾). თუ მიმღები ქვეყანა თარგმანზეც აპოსტილს ითხოვს, თარგმანის ნოტარიული დამოწმება კიდევ ერთხელ აპოსტილდება.

ყველაზე ხშირი შეცდომა თანმიმდევრობაშია: ჯერ თარგმნიან, მერე აპოსტილებენ ორიგინალს, და თარგმანი აპოსტილს არ მოიცავს. მეორე შეცდომა: ასლის აპოსტილება ნოტარიული დამოწმების გარეშე, უბრალო ქსეროასლს არავინ აპოსტილებს.

უცხოური დოკუმენტი საქართველოში

იგივე ლოგიკა პირიქით: უცხოური მინდობილობა, დიპლომი, ქორწინების მოწმობა ან კომპანიის ამონაწერი საქართველოში აპოსტილით (კონვენციის ქვეყნიდან) ან ლეგალიზაციით მოდის, შემდეგ აქ ითარგმნება და თარგმანი ნოტარიულად მოწმდება. ქართველი ნოტარიუსი აპოსტილის გარეშე მოსულ უცხოურ მინდობილობას გარიგებაში ვერ გამოიყენებს. გამონაკლისია საქართველოს საკონსულოში დამოწმებული დოკუმენტი: ის ქართული სანოტარო აქტის ტოლფასია და აპოსტილი არ სჭირდება.

უცხოური პასპორტი აპოსტილს არ საჭიროებს, მხოლოდ ნოტარიულად დამოწმებულ თარგმანს რეესტრისა და ბანკისთვის. დოკუმენტის ფოტო WhatsApp-ით გამოგვიგზავნეთ და თარგმანს დამოწმებით ერთ დღეში მიიღებთ.

ხშირი სიტუაციები

ეს სტატია ზოგადი ინფორმაციაა №507 დადგენილების ტარიფებზე და მოქმედ კანონმდებლობაზე დაყრდნობით, 30.09.2026-ის მდგომარეობით; კონკრეტულ საქმეზე საბოლოო თანხას და საბუთების სიას ნოტარიუსი ადგენს. შენიშნეთ უზუსტობა? მოგვწერეთ.